Noviot Pochetok

Новиот Почеток – Еден класично не-кул бенд, кој упорно свири тотално не-актуелна музика од минатиот век, започнувајќи од 2002-та. Фини момци кои немаат инди фризури, иако го поддржуваат инди трендот. Еден од малкуте бендови кој успеа да го преживее Македонскиот Тезга Холокауст (добро... делумно успеа). Еден обичен бенд кој нема евровизиски хит, и без спонзорства успеа да издаде два албуми ("Еволуцијата би требало да започне сега..." за сопствената Sixtynine DIY Records, 2006 и "Агнозија" за Enterprise Records, 2009) и досега да продаде вкупен тираж од 1000 парчиња, победувајќи голем број од "Џет Сетерите" од естрадата кој воедно, немаат свој џет во сетот. Едни од малкуте кои сеуште наивно веруваат во утописки приказни за деца. Се на се, уште еден филм кој морате да го пропуштите, заедно со сите други филмови на владата и опозицијата.

Blank File (Serbia)

Приказната за Blankfile започнува во 2002 година, кога четирите гордо арогантни и искрени до болка, млади момчиња одлучија да се кренат над стереотипната секојдневна рутина и јавно да застанат во одбрана на своите идеали и принципи. Занемарувајќи го конвенционалниот систем на вредности, уште во тоа време, групата ја освои публиката и ги доби првите фанови- нивните вистински критичари. Петар (вокал, гитара), Урош (тапани), Ненад (гитара, придружн вокал) и Душан (бас-гитара, придружен вокал).

Vibrator u rikverc (Serbia)

Провокативни и заводливи, панк дивите од Панчево, Vibrator u rikverc, се најпознатиот женски бенд во Србија. Нивната музика потсетува на раните почетоци на Ramones и на современиот јапонски андерграунд звук.  Не дозволувајте да ве измами нивниот изглед: убавите мачки имаат остри канџи и можат да му парираат на кој било хардкор панк бенд. Девојките се доказ дека популарноста не значи оддалечување од панкот.

Screaming for Change

Screaming for Change e хардкор бенд од Скопјe. Постојат од мај 2008 година и за прв пат се појавуваат на последниот концерт на македонскиот легендарен состав FxPxOx. Беа дел од Hardcore Family Reunion фестивалот во Скопје и имаат настапувано неколку пати на локално ниво заедно со повеќе бендови од домашната сцена. Во март оваа година го промовираа својот прв албум кој е исполнет со енергичен хардкор и зачинет со опасен beat-down.  

Beda Xpress

Beda Xpress е скопски бенд составен 2006 година од 4 члена: Бојан Филиповски (бас гитара, вокал), Бојан Арнаудовски (гитара), Дамјан Костовски (гитара) и Виктор Филиповски (тапани). Свират мелодичен хардкор панк. Позади себе имаат едно издание “Ебате беља...”.
Забележителни настапи имаа на: C.M.O.K. fest - Црвенка, Пиволенд, Бум Таксират Фестивал, промоцијата на “Ебате беља...” во клубот Хавана заедно со Straight Mickey & the Boyz и други.

Shock Troopers

Shock Troopers е оформен при крајот на летото 2007 година во Скопје. Бендот е составен од 5 млади слободни уметници кои создаваат музика која е мешавина од старошколски crust, grind corе  и  мала доза на metal сегменти. Низ изминатите години најчесто имаат настапувано во Скопје, низ неколку македонски градови (Тетово, Кочани, Куманово). Нивното деби издание е во подготовка и најверојатно ќе биде достапно за набавка на фестивалот. Ветуваат енергичен настап и супер атмосфера.

Sennen

Од Холандија ни доаѓа четиричлената експериментална post-rock група, Sennen. Формиран во 2000 година, бендот го сочинуват тапанар, бас-гитарист и двајца мулти-инструменталисти кои создаваат енергичен инструментален саунд.  Труба, клавијатури, хармониум и вибрафон се меѓу инструментите кои придонесуваат за поширог опсег во атмосферата.  Во 2004 година тие го издадоа своето прво демо “Periphery”. По три години и  неколку измени во составот нивното мини CD “Automatic Writing”  стигна на топ листите. Sennen им беа поддршка на “Blonde Redhead”, “Do Make Say Think”, “Enablers” и “The Gathering”. Во 2008 година VJ Karen стана перманентен член на оваа строго инструментална, аммм... “edgy guitar driven jazz-like uptempo postrock music” J со труби, егзотични ритмови и моќен бас. Моментално работат на нов материјал кој планираат да го издадат годинава.

Fonija

Фонија е трио кое се бори за егзистенција на македонската сцена од 2007 година. Средношколски бенд со големи амбиции. Свират гневен, пост-тинејџерски панк-рок со искрени текстови и едноставни рифови. Зад себе имаат две изданија, DIY изданието „Параноја“ од 2008 и „Петар Пан синдром“ издаден за PMG Recordings во 2010. Неуморно работат на материјалот кој треба да се најде на нивниот трет албум

Remnants

Remnants постојат од 2008, претходно под името Emophobic. Свират мешавина на crust/hc punk инспириран од општествените стеги и неправди. Позади себе имаат еден албум достапен за download, учество во компилацијата "Tribute to Patareni" на PMK Records, а се подготвува и сплит со Shock Troopers, како и уште еден албум кој е во тек на снимање. Досега имаат настапувано низ Македонија, најчесто во Скопје, Куманово и Кочани.

The Glasses (Kosovo)

Оваа година на Аларм фестивал ќе настапи еден од најперспективните бендови од регионот приштинскиот инди рок состав The Glasses. Бендот е основан во 2007 година и во него членуваат четири извонредни музичари. По концертот во младинскиот центар на црвениот краст во Приштина, овој состав буквално го окупираше целиот град а многумина ги најавуваат како како бенд кој во блиска иднина ќе се пробие и во светски рамки.

Hardfaced

Hardfaced е формиран почеток на 2004 во Охрид, Македонија. Шест другари под влијанија на различни музички стилови како хардкор, метал, панк и хип хоп создадоа оригинален и препознатлив хардкор/метал звук. Во 2007-та со следнава постава: Диме – вокал, Климо – вокал, Горан – гитара, Јован – гитара, Игор – бас и Бојан – тапани, го снимаат и сами го издаваат првиот деби албум со наслов “More than hate”. Албумот добива одлични критики на Македонската и Балканската андерграунд сцена и е комплетно распродаден. Истата година е реиздаден и во Бугарија преку “Years of Pain records”. Следат неколку настапи по Бугарија и Србија, а песната “Hope” се појавува и на Балканска хардкор компилација издадена во Белград. Албумот е промовиран низ цела Македонија. Во 2008-та точно пред да влезат во студио да го снимат вториот албум, Бојан го напушта бендот. На негово место доаѓа Јордан кој внесува нова свежина, цврстина и стабилност во бендот. Конечно во 2009-та повторно влегуваат во “Krecho Sound Studio” и го снимаат вториот долго свиречки албум со наслов “Show them what they fear” кој ке биде издаден во текот на 2010.

Furion

Mлад скопски бенд кој се оформува 2007та година и истата дебитира на скопската сцена. Нивниот стил е комбинација од традиоцинални метал форми (особено треш, спид и кросовер) со добро инкопорирани мелодии и ритми од македонскиот фолклор. Од почетокот па досега имаат настапувано низ повеќе македонски градови, како и во странство. Нивен најголем успех е тоа што беа дел од W.O.A Metal Battle концертите во Скопје, Бања Лука а потоа и на самиот W.O.A фестивал во Гермaнија. Исто така имаат свирено и на поголеми настани во Скопје како што се Бела Ноќ, Пиволенд и други.Досега имаат издадено едно демо во 2009та година кое е насловено Furion.Снимањето на нивниот деби албум е во тек.

Constantine Odessa

Константин Одеса e соло-проект на Константин Лошков, басистот на добропознатите Denny te Chuva.  По неколку години поминати во бенд- околина, Константин одлучуи сам да продолжи пантаму.  Неговата соло кариера му овозможи посеопфатна креативна слобода и подобар начин да го изрази она што го чувствува. На фестивалот "Нектар Демо Фест", во Бања Лука,  на кој се пријавија повеќе од 300 групи од бившата федерација, успеа да се пласира во првите 10. Ова воедно беше и негов прв настап како независен артист.
Моментално работи на својот деби албум во кој ќе земат учество повеќе музичари, меѓу кои и неколку членови на Македонската филхармонија. Под влијанија на американскиот фолк и инди рок, тој сам ја пишува музиката која ја изведува. Constantine Odessa иако започна како соло обид на Коста, денес прераснува во петорка која несомнено носи свежина на македонската сцена.

Bomzich

Бомзич е нов артист на македонската музичка сцена. Танцувајки низ меланхолија до силен оптимизам, она што го добивате со оваа млада артистка, која носи освежување во сферата на музиката кај нас, е синергија на впечатлив силен глас и акустични гитарски рифови. Без придружни вокали или пак други инструменти, мелодијата дозволува целосно да се ценат потенцијалите на артистот. Музиката на Бомзич може да се опише како музика на пролетта и природата.

Better Decision

Better Decision е метал бенд, формиран 2006 година во Скопје, Македонија. Уште во првата година од своето постоење, бендот бележи настапи на Rock Fest и Motor Fest. Во 2007 бендот настапуваше неколку пати низ Македонија, а имаше и настап на PULJP фестивалот во Бољевац, Србија. 2007 е и годината кога BD за прв пат влегоа во студио и го снимија својот деби албум насловен како “Wasted Dream”. промоцијата на албумот беше во 2008, кога и албумот е издаден. Во 2009та бендот бележи многубројни настапи, меѓу кои и со бендови како: Torture Squad, Celice, Plague Mass, Endsight, Good Old Days и др. Во почетокот на 2010та бендот започна со снимањето на вториот албум.

Risto Gusic & Friends

Ристо Гушиќ слободно може да го опишеме како македонскиот Џони Кеш. Интересна животна приказна прелеана во музичка поезија што нe води низ неговиот живот и суровата балканска транзиција. По долги перипетии, превирања, азил и сообраќајна несреќа, Ристо Гушиќ – Рила повторно ќе ни дозволи да повлечеме од неговото луле и ќе ни ја отвори вратата од неговиот бурен свет. Ристо Гушиќ има богата музичка кариера, членувал во повеќе бендови како: Патрис, Two Sides, sk02, Шепардс Јунајтед, џезерите Сет, а најмногу се афирмира како соло-артист и филмски актер. Во моментов живее во изолација на непозната дестинација. Оваа средба ќе ни овозможи да ги чуеме сите фази на овој неповторлив музички кантавтор.

Lost Bear

И уште еден бенд од Холандија, формиран есента 2007 година од страна на “шест влакнети мажи со дванаесет нозе во сегашноста и шест умови во 90-тите”. Под широк спектар на влијанија (Pavement, Modest Mouse, Dinosaur Jr., Archers of Loaf и Cap’n Jazz) и заедно со нивните двајца тапанари успеаа да создадат свој препознатлив звук: одличниот баланс на емоционален hardcore, indie rock и power pop. Зад Lost Bear се кријат: Gino (гитара), Casper (вокал, хармоника), Stefan (гитара, клавијатури), Arno (бас), Ferdinand (тапани, клавијатури) и Gibson (тапани).

Noise

Noise се формирани во 2007, со првичното име Atomic Wedgie со кое победија на Winnerfest (каде што добија снимање на албум и издавање на истиот,од Литиум рекордс). Во почетокот на 2009 имаат измени во сегашното име, стилот (Punk-rock), како и во својот состав. Бендот во 2009 имаше голем број на настапи,заедно со повеќе бендови како: The Toasters, Deal's Gone Bad, Новиот Почеток, Бастиан, Jaya the Cat... итн.. По едно годишно активни настапи, бендот влезе во студио каде што го сними својот прв албум,кој сеуште не е издаден. Издавањето на албумот се планира за почетокот на есента, оваа година...